Часы Святой Пасхи.
Это последование бывает во всю Светлую седмицу вместо повечерия и полунощницы, а также вместо утренних и вечерних молитв.
Моли́твами святы́х отéц нáших, Гóсподи Иису́се Христé, Боже наш, поми́луй нас. Ами́нь.
Христóс воскрéсе из мéртвых, смéртию смерть попрáв, и су́щим во гробéх живóт даровáв. (Трижды)
Воскресéние Христóво ви́девше, поклони́мся святóму Гóсподу Иису́су, Еди́ному безгрéшному. Кресту́ Твоему́ покланя́емся, Христé, и святóе воскресéние Твоé поéм и слáвим: Ты бо еси́ Бог наш, рáзве Тебé инóго не знáем, и́мя Твоé имену́ем. Прииди́те вси вéрнии, поклони́мся святóму Христóву воскресéнию: се бо прии́де Крестóм рáдость всему́ ми́ру. Всегдá благословя́ще Гóспода, поéм воскресéние Егó: распя́тие бо претерпéв, смéртию смерть разруши́. (Трижды)
Ипакои, глас 8-й:
Предвари́вшия у́тро я́же о Мари́и, и обрéтшия кáмень отвалéн от грóба, слы́шаху от Ангела: во свéте присносу́щнем Су́щаго, с мéртвыми что и́щете я́ко человéка? ви́дите грóбныя пелены́, тецы́те и ми́ру проповéдите, я́ко востá Госпóдь, умертви́вый смерть, я́ко есть Сын Бóга, спасáющаго род человéческий.
Кондак, глас 8-й:
Аще и во гроб снизшéл еси́, Безсмéртне, но áдову разруши́л еси́ си́лу, и воскрéсл еси́ я́ко победи́тель, Христé Бóже, женáм миронóсицам вещáвый: рáдуйтеся, и Твои́м апóстолом мир дáруяй, пáдшим подая́й воскресéние.
Тропари, глас 8-й:
Во грóбе плóтски, во áде же с душéю я́ко Бог, в раи́ же с разбóйником, и на престóле был еси́, Христé, со Отцéм и Ду́хом, вся исполня́яй, Неопи́санный.
Слава Отцу́ и Сы́ну и Святóму Ду́ху.
Яко живонóсец, я́ко рая́ краснéйший, вои́стинну и чертóга вся́каго цáрскаго показáся светлéйший, Христé, гроб Твой, истóчник нáшего воскресéния.
И ны́не и при́сно и во вéки векóв. Ами́нь.
Вы́шняго освящéнное Божéственное селéние, рáдуйся: Тобóю бо дадéся рáдость, Богорóдице, зову́щим: благословéнна Ты в женáх еси́, всенепорóчная Влады́чице.
Гóсподи, поми́луй. (40 раз)
Слáва Отцу́ и Сы́ну и Святóму Ду́ху, и ны́не и при́сно, и во вéки векóв. Ами́нь.
Честнéйшую херуви́м и слáвнейшую без сравнéния серафи́м, без истлéния Бóга Слóва рóждшую, су́щую Богорóдицу Тя величáем.
Христóс воскрéсе из мéртвых, смéртию смерть попрáв, и су́щим во гробéх живóт даровáв. (Трижды)
Слáва Отцу́ и Сы́ну и Святóму Ду́ху, и ны́не и при́сно, и во вéки векóв. Ами́нь.
Гóсподи, поми́луй. (Трижды). Благослови.
Гóсподи Иису́се Христé, Сы́не Бóжий, моли́тв рáди Пречи́стыя Твоея́ Мáтере, преподóбных и богонóсных отéц нáших и всех святы́х, поми́луй нас. Ами́нь.